سلام عليكم ورحمة الله وبركاتة عدنا اليكم من جديد في تدوينه جديدة عن آخر الأجهزة المطبخية الي اقتنيتها
اليوم بتكلم لكم عن جهاز بريڤلي breville- the infuser وعشان انظم لكم الموضوع واسهل لكم الوصول للمعلومات راح اكتب لكم النقاط اللي راح اتكلم عنها هنا :
١- ايش اكثر شيء اعجبني بالجهاز ؟
٢- ايش اللي ما اعجبني فيه؟
٣- افضل قهوة جربتها فيه؟
٤- نهاية القول : هل اوصي فيه او لا؟
قصتي مع القهوة :
كنت - ومازلت - احب القهوة السوداء السادة ،اعشق طعمها، و اكرة التغيير في قهوتي واكره النكهات الغريبه اللي طايحين فيها الناس هالفترة ، وبرضو ما احب الكبسولات احسها تغير طعم القهوة وتخفي جوهرها اللذيذ ، سابقاً كنت احضر قهوتي بطريقه بسيطة جداً بإستخدام الفرينش بريس و استمتع فيها كل صباح ، الى ان جاء ذاك اليوم السعيد الذي تذوقت فيه الاسبريسو وتعلمت صِناعة كوب اللاتيه بنفسي - فجأة حسيت اني دخلت عالم جديد وجميل جدا ولذيذ ! لذلك توكلنا على الله واشترينا هذا الجهاز .
اكثر شيء اعجبني بالجهاز ؟
اعجبني فيه بالبداية حجمة ! حجمه الصغير كان مثالي لمطبخي ( مطبخي نتفة ) ، لذلك اظن انه يناسب المطابخ الصغيرة او المكاتب بيكون مثالي .
ثانياً، سهولة استخدام الجهاز وتحضير الاسبريسو فيه سهل جداً ويناسب حتى المبتدئين في عالم القهوة المختصة ، وطعم القهوة لذييذ ومن بعد اقتناء الجهاز صرت ما اطلب قهوة من المقاهي ، لذلك اعتبره استثمار جيد 💰
ثالثاً ، يبخر كل انواع الحليب بطريقة رائعة ، جربت وبخرت كل انواع الحليب ( حليب اللوز، الصويا ، والحليب العادي ) يبخره بطريقة لذيذة وعلى اسلوب المقاهي، بالرغم من اني مُبتدئه في عالم التبخير الى ان الموضوع كان اسهل مما اتخيل و النتيجة مثل ما احب تماماً .
ايش اللي ما اعجبني فيه؟
سعره مرتفع نوعاً ما ، الجهاز اشتريناه ب٢٦٠٠ ريال تقريباً ، وتمنيت ان سعره يكون اقل شوي ، و لكن لما نقارن سعره بباقي اجهزة الاسبريسو فـ سعره هنا هو الافضل ( مقارنه بالجودة ) ⁃ نوع جهازي هو breville- the infuser , هو جهاز جيد و لكن عند الشراء ارتكبنا خطأ وهو اننا اشرينا النوع اللي يجي بدون طاحونه خاصة بالإسبريسو ، فكرنا ان ممكن نستغني عنها بالطاحونه العادية - كان خطأ- تعلمناه بالطريقةالصعبة 😂 اكتشفنا ان الاسبريسو عشان يضبط نحتاج طاحونه خاصة ، هالشيء اجبرنا نشتري طاحونه اسبريسو من ماركة ديلونجي - وكانت اختيار جيد و بسعر ممتاز - بحط لكم صورتها - اخذناها من اكسترا وسعرها في حدود ٣٠٠ ريال سعودي .
افضل قهوة جربتها فيه؟
الناس بالقهوة اذواق ! البعض يحب القهوة اللي تحميصها خفيف و البعض يحب تحميص متوسط و فيه نوع مثلي يحب القهوة الي تحميصتها غامقة - قوية او ( دارك روست) ، افضل القهوات اللي جربتها هي من ستاربكس ( قهوة Sumatra ) و ايضاً قهوة سيقافريدو جداً لذييذة ، طبعا فيه انواع كثير جربتها كلها جيدة ولكن اللي كتبتها لكم هي الافضل.
نهاية القول : هل اوصي فيه او لا؟
اذا كنت من مدمنين القهوة- مثلي - وحاب انك تستغني عن قهوة المقاهي بصنع قهوتك الخاصة بالمنزل بنفس جودة قهوة المقاهي فأوصي به بشدة ، لاني اعتبر هذا الجهاز استثمار جيد للمال على المدى البعيد💰
اتمنى ان كل المعلومات اللي ذكرتها كانت مفيدة واتمنى لكم اوقات سعيدة = )
واتشرف بتواصلكم على مواقع التواصل الاجتماعي :
سناب : deemzblog89
انستغرام : deemah_alotaibi
شارك التدوينه مع شخص مهتم بشراء جهاز قهوة جديد للمنزل .